ವಚನ ದಾಸೋಹ

#ವಚನ:

#ಲಿಂಗವೆಂಬುದು ಪರಶಕ್ತಿಯುತ ಪರಶಿವನ ನಿಜದೇಹ,

ಲಿಂಗವೆಂಬುದು ಪರಶಿವನ ಘನತೇಜ,

ಲಿಂಗವೆಂಬುದು ಪರಶಿವನ ನಿರತಿಶಯಾನಂದಸುಖವು,

ಲಿಂಗವೆಂಬುದು ಪರಶಿವನ ಪರಮಜ್ಞಾನ,

ಲಿಂಗವೆಂಬುದು ಷಡಧ್ವಮಯ ಜಗಜ್ಜನ್ಮಭೂಮಿ,

ಲಿಂಗವೆಂಬುದು ಅಖಂಡಿತವೇದ ಪಂಚಸಂಜ್ಞೆ,

ಲಿಂಗವೆಂಬುದು ತಾ ಹರಿಬ್ರಹ್ಮರ ನಡುಮನೆಗಳ ಜ್ಯೋತಿರ್ಲಿಂಗ,

ಅಖಿಲಾರ್ಣವಾ ಲಯಾನಾಂ ಲಿಂಗಂ ಮುಖ್ಯಂ ಪರಂ ತಥಾ

ಪರಂ ಗೂಢಂ ಶರೀರಸ್ಥಂ ಲಿಂಗಕ್ಷೇತ್ರಮನಾದಿವತ್

ಯದಾದ್ಯಮೈಶ್ವರಂ ತೇಜಸ್ತಲ್ಲಿಂಗಂ ಪಂಚಸಂಜ್ಞಕಂ ಎಂದಿದು ಲಿಂಗದ ಮರ್ಮ.

ಉರಿಲಿಂಗಪೆದ್ದಿಪ್ರಿಯ ವಿಶ್ವೇಶ್ವರ.

ಲಿಂಗದೊಳಿದ ತಿಳಿಯಬಲ್ಲವನೇ ಬಲ್ಲವನು. 

/ 260

- ಉರಿಲಿಂಗ ಪೆದ್ದಿ ಶರಣರು

 *ಅರ್ಥ:*

 "ಲಿಂಗ"ವೆಂದರೆ ಪರಾಶಕ್ತಿಯುಕ್ತ  ಪರಶಿವ.ಅಂದರೆ ಶಿವ ಶಕ್ತಿ ಸಂಪುಟ. ಶರಣ ಧರ್ಮದಲ್ಲಿ ಶಕ್ತಿ ಎಂದರೆ ಪರಶಿವನ ಚಿತ್ ಶಕ್ತಿ.

"ಲಿಂಗ"ವೆಂದರೆ ಪರಶಿವನ ನಿಜದೇಹ, ನಿರಾಕಾರ ದೇವನ ನಿಜದೇಹ  ಅಥವಾ ಸಾಕಾರದ ಸಂಕೇತ. 

"ಲಿಂಗ"ವೆಂದರೆ ಪರಶಿವನ ತೇಜ, ಆನಂದ, ಪರಮಜ್ಞಾನ. ಅಂದರೆ ಪರಶಿವನ ಪ್ರಕಾಶ, ಆನಂದ, ಜ್ಞಾನಗಳ ತವರು.

"ಲಿಂಗ" ವೆಂದರೆ ಪರಶಿವ. ಲಿಂಗವೆನ್ನುವುದು ಪರಶಿವನಿಗೇ. 

"ಲಿಂಗ"ವು  ಷಡ್ ತತ್ವಗಳಿಂದ ಕೂಡಿದ ಜಗತ್ತಿನ ಜನ್ಮ ಭೂಮಿ. ಅಂದರೆ ವಿಶ್ವವನ್ನ ಹೆತ್ತ ಮಹಾ ಗರ್ಭ. 

 "ಲಿಂಗ"ವು ಹರಿ, ಬ್ರಹ್ಮರಿಗೆ ಮೀರಿದ ಜ್ಯೋತಿ ಸ್ವರೂಪನು. 

"ಲಿಂಗ"ವು ಸಮಸ್ತ ಸಚರಾಚರ ವಸ್ತುಗಳಿಗೆಲ್ಲ ಆಲಯವು ಮತ್ತು ಸಮಸ್ತ ಜಗತ್ತು ಲಯವಾಗಲು ಇರುವ ಗಮ್ಯವು

ಇಂಥ ವಿಶ್ವೇಶ್ವರ ಲಿಂಗದ ಮರ್ಮ ತಿಳಿಯ ಬಲ್ಲಾತನೆ ಬಲ್ಲವನು.

"ಲಿಂಗ" ಪದದ ಬಳಕೆಯನ್ನ ವೈವಿಧ್ಯಮಯ

ಅರ್ಥಗಳೊಡನೆ ಮಾಡಬಹುದೆಂದು ಉರಿಲಿಂಗ ಪೆದ್ದಿಗಳು ಅಭಿಪ್ರಾಯ ಪಡುತ್ತಾರೆ. 

ಭಾವ:

 "ಲಿಂಗ" ಪದವು ಪರಮಾತ್ಮ ವಾಚಕ, ಪರಶಿವ ಸೂಚಕ. "ಲಿಂಗ" ಪದದ ಅರ್ಥವು ವ್ಯಾಪಕವಾಗಿದೆ. ಇಷ್ಟಲಿಂಗದ ಅರ್ಥವು ಚಿಹ್ನೆ, ಗುರುತು ಕುರುಹು ಎಂದು ಹೇಳಬಹುದು, ವಚನಗಳಲ್ಲಿ 'ಪರಶಿವ, ಶಿವ, ಲಿಂಗ, ಶರಣರ ಅಂಕಿತನಾಮಗಳು ಎಲ್ಲಾ ಪದಗಳು ಪರಶಿವನನ್ನು ಸಂಕೇತಿಸುತ್ತವೆ. 

"ಲಿಂಗ"ವನ್ನು ಮಗ್ಗಿಯ ಮಾಯಿದೇವರು ತಮ್ಮ ಶಿವಾನುಭವ ಸೂತ್ರದಲ್ಲಿ ಹೀಗೆ ವ್ಯಾಖ್ಯಾನಿಸುತ್ತಾರೆ. 

ಲೀಯತೆ ಗಮ್ಯತೇಯತ್ರ ಏನ ಸರ್ವಂ ಚರಚರಂ. ತದೇ ತಲ್ಲಿಂಗ ಮಿತ್ಯುಕ್ತಂ ಲಿಂಗತತ್ತ್ವ ಪರಾಯಣ್ :

ಈ ತೋರುವ ಸಚರಾಚರ ಸೃಷ್ಟಿಯಲ್ಲವೂ ಯಾವುದರಿಂದ ಹೊರಹೊಮ್ಮಿ, ಎಲ್ಲಿ ಲೀಲೆಯಾಡಿ ಕೊನೆಗೆ ಯಾವುದರಲ್ಲಿ ಲಯವಾಗುವುದೋ ಅದು ಲಿಂಗವೆಂದು ಮಗ್ಗೆಯ ಮಾಯಿದೇವರು ಲಿಂಗಕ್ಕೆ ನಿರ್ವಚನ ನೀಡಿದ್ದಾರೆ. ಸಕಲಚರಾಚರ ತೋರುವ ತೋರಿಕೆಯಲ್ಲದಕ್ಕೂ ಆಧಾರಭೂತವಾಗಿ, ಅದರ ಸೃಷ್ಟಿ ಸ್ಥಿತಿ ಲಯಗಳಿಗೆ ಕಾರಣ ಕರ್ತೃವಾಗಿ ಇರುವ ಅವ್ಯಕ್ತವಾದ ಚೈತನ್ಯವೇ ಲಿಂಗವೆಂದು ಹೇಳಬಹುದು.

#'ಲಿ' ಕಾರವೆ ಶೂನ್ಯ, ಬಿಂದುವೆ ಲೀಲೆ,

 `ಗ' ಕಾರವೆ ಚಿತ್ತು.

ಈ ತ್ರಿವಿಧದೊಳಗಿದೆ ಲಿಂಗವೆಂಬ ಸಕೀಲ.

ಇದರ ಸಂಚವನಾವಾತ ಬಲ್ಲ ಆತನೆ ಲಿಂಗಸಂಗಿ.

ಇದು ಕಾರಣ-ಲಿಂಗಾನುಭವಿಗಳ ಶ್ರೀಚರಣಕ್ಕೆ

ನಮೋ ನಮೋ ಎಂಬೆ ಕೂಡಲಚೆನ್ನಸಂಗಮದೇವಾ / 1306

ಚಿತ್ ಚೈತನ್ಯ ಗಮಿಸಿ ಜಗತ್‌ ಚೈತನ್ಯವಾಗಿ

ಸೃಷ್ಟಿಯಾಯಿತ್ತಾಗಿ "ಗ" ಕಾರವೇ ಚಿತ್ತು ಎಂಬುದಾಗಿಯೂ, ಆ ಮಧ್ಯದ ಚಿದ್ಬಿಂದುವೆ ಆ ಚಿತ್ ಚೈತನ್ಯಕ್ಕೆ ಅಂಗವಾಗಿ ಲೀಲಾಸ್ತಿತಿಯ ನಟಿಸುತ್ತಿಹುದಾಗಿ, ಬಿಂದುವೇ ಲೀಲೆ ಎಂದೂ,

ಜಗದ ಉತ್ಪತ್ತಿ ಸ್ಥಿತಿ ಲಯಗಳು ಯಾವುದರಿಂದ ಆಗುವುದೋ ಅದುವೇ ಲಿಂಗವೆಂದೂ ಲಿಂಗ ಶಬ್ದಕ್ಕೆ ನಿರ್ವಚನ ಮಾಡಿದ್ದಾರೆ ಮತ್ತು

ಅಂಥ ಲಿಂಗದ ಮರ್ಮವನರಿದು ಆಚರಿಸುವ ಲಿಂಗನುಭಾವಿಗಳಿಗೆ ಶರಣು ಮಾಡಿದ್ದಾರೆ ಚೆನ್ನಬಸವಣ್ಣನವರು.

ಲಿಂಗವೆಂಬುದು ಸತ್ ಚಿತ್ ಆನಂದ, ನಿತ್ಯ ಪರಿಪೂರ್ಣ, ಸರ್ವಲೋಕೋತ್ಪತ್ತಿಗೆ ಕಾರಣ ಎನ್ನುತ್ತಾರೆ ಎಡೆಯೂರು ಸಿದ್ಧಲಿಂಗೇಶ್ವರರ ಶಿಷ್ಯರಾದ ಸ್ವತಂತ್ರ ಸಿದ್ಧಲಿಂಗೇಶ್ವರರು.

#ಲಿಂಗವೆಂಬುದು ಸರ್ವಕಾರಣ ಪರಮ ನಿರ್ಮಲ.

ಲಿಂಗವೆಂಬುದು ಸಚ್ಚಿದಾನಂದ ನಿತ್ಯಪರಿಪೂರ್ಣ.

ಲಿಂಗವೆಂಬುದು ಸರ್ವಲೋಕೋತ್ಪತ್ತಿಗೆ ಮೂಲಕಾರಣ.

ಲಿಂಗವೆಂಬುದು ಜನ್ಮವಾರಿಧಿಯ ದಾಂಟಿಸುವ ಭೈತ್ರವು.

ಲಿಂಗವೆಂಬುದು ಶರಣರ ಹೃದಯದಲ್ಲಿ ಬೆಳಗುವ

ಜ್ಯೋತಿರ್ಮಯ ಲಿಂಗವು.

ಇಂತೀ ಲಿಂಗದ ಮರ್ಮವನರಿದವನೇ ಅರಿದವನು,

ನಿಜಗುರು ಸ್ವತಂತ್ರಸಿದ್ಧಲಿಂಗೇಶ್ವರಾ. / 332

'ಲಿಂಗ' ಅರ್ಥಾತ್ ಪರಮಾತ್ಮನು ಸರ್ವಕಾರಣ ನಿರ್ಮಲನು, ಅಂದರೆ ತಾನು ವಿಕಾರಕ್ಕೊಳಗಾಗದೆಯೇ (ಬದಲಾಗದೆ) ಎಲ್ಲವನ್ನೂ ಸೃಷ್ಟಿಸಬಲ್ಲ, ಲಯವಾಗಿಸಬಲ್ಲ. ಎಲ್ಲಕ್ಕೂ ಆದಿ ಕಾರಣವಾದ ಮೂಲಶಕ್ತಿ. ಸಕಲ ತತ್ವಗಳಿಗೆ ಆಶ್ರಯೀಭೂತವಾದುದು, ಚೈತನ್ಯ ಸ್ವರೂಪವು. ಇದು ಪ್ರಕಾಶ ಸ್ವರೂಪವು. ಜೀವರ ಹೃದಯ ಕಮಲದಲ್ಲಿ ಅಂಶರೂಪದಲ್ಲಿ ಆತ್ಮವಾಗಿ ನೆಲೆಸಿರುತ್ತದೆ.

"ಜನ್ಮ ವಾರಿಧಿಯ ದಾಂಟಿಸುವ ಭೈತ್ರ” ಎಂಬಲ್ಲಿಗೆ ಲಿಂಗ ಪದವು ಉಪಾಸ್ಯ ವಸ್ತುವಾದ ಇಷ್ಟಲಿಂಗವನ್ನು ನಿರ್ದೇಶಿಸುತ್ತದೆ. ಮಾನವ ಜನ್ಮವೆಂಬ ಭವಸಾಗರವನ್ನ ದಾಟಲು ಇದು ಒಂದು ನಾವೆ ಎಂಬುದಾಗಿ ಪ್ರತಿಪಾದಿಸಲ್ಪಟ್ಟಿದೆ. ಈ ಮರ್ಮವನ್ನರಿತು ನಡೆದಾಗಲೇ ಓರ್ವನು ಶಿವನುಭಾವಿಯಾಗಬಲ್ಲ ಎನ್ನುತ್ತಾರೆ ಸ್ವತಂತ್ರ ಸಿದ್ದಲಿಂಗೇಶ್ವರರು.

ಹೀಗೆ ಎಲ್ಲಾ ವಚನಕಾರರು, ಪರಾತ್ಪರ ವಸ್ತುವನ್ನು ಲಿಂಗವೆಂದೂ, ಶಿವನೆಂದೂ, ಬಯಲು, ನಿರ್ಬಯಲೆಂದೂ, ಶೂನ್ಯ-ನಿಶೂನ್ಯವೆಂದು ಕರೆದಿದ್ದಾರೆ.

#ಅಮೂಲ್ಯನು ಅಪ್ರಮಾಣನು ಅಗೋಚರ ಲಿಂಗ; ಆದಿ ಮಧ್ಯಾವಸಾನಗಳಿಲ್ಲದ ಸ್ವತಂತ್ರ ಲಿಂಗ; ನಿತ್ಯ ನಿರ್ಮಳ ಲಿಂಗ; 

ಅಯೋನಿ ಸಂಭವನಯ್ಯಾ, 

ನಮ್ಮ ಕೂಡಲಸಂಗಮದೇವರು./58*

ಬಸವಣ್ಣನವರು "ಲಿಂಗ" ಎಂಬ ಪದದ ತಾತ್ವಿಕ ಅರ್ಥವನ್ನು ಸ್ಪಷ್ಟವಾಗಿ ಹೇಳಿದ್ದಾರೆ. ಪರಮಾತ್ಮನು ಅಮೂಲ್ಯನು; ಬೆಲೆ ಕೆಟ್ಟ ಲಾರದವನು; ಯಾವುದೇ ಲೌಕಿಕ ಪ್ರಮಾಣಗಳಿಂದ ಸಾಧಿಸಿ ತೋರಿಸದ ಅಪ್ರಮಾಣನು; ಪಂಚೇಂದ್ರಿಯಗಳ ಅನುಭವಕ್ಕೆ ನಿಲುಕದ ಆಗೋಚರನು, ಹುಟ್ಟು ಅವಸಾನ ಇಲ್ಲದ, ಪರವಲಂಬಿಯಲ್ಲದ ಸ್ವತಂತ್ರನು, ನಾಶವಿಲ್ಲದ ನಿತ್ಯನು; ಕಾಮ ಕ್ರೋಧಾದಿಗಳೇನು ಇಲ್ಲದ ನಿರ್ಮಲನು, ಅವನು ತಾಯಿತಂದೆಗಳಲ್ಲಿ ಹುಟ್ಟಿದವನಲ್ಲ, ಅಸಂಭವ ಅಜಾತ ಹೀಗೆ "ಲಿಂಗ" ಪದವು ನಿರ್ದೇಶಿಸುವುದು ಪರಾತ್ಪರ ಪರಬ್ರಹ್ಮವಾದ ಪರಶಿವನನ್ನು.

ಇಡೀ ಬ್ರಹ್ಮಾಂಡವನ್ನು ಲಿಂಗರೂಪದಲ್ಲಿ ಆರಾಧನೆಯಾಗಿ ಮಾಡಿ ಲಿಂಗಾಂಗ ಸಾಮರಸ್ಯದಿಂದಲೇ ಬ್ರಹ್ಮಾಂಡದ ಸತ್ಯದರ್ಶನ ಮಾಡಿದ ಅನುಭಾವಿಗಳು ನಮ್ಮ ಶರಣರು.

- ✍️Dr Prema Pangi

#ಪ್ರೇಮಾ_ಪಾಂಗಿ,#ಶರಣ_ಉರಿಲಿಂಗಪೆದ್ದಿ

#ಲಿಂಗವೆಂಬುದು_ಪರಶಕ್ತಿಯುತ_ಪರಶಿವನ

#ಲಿ_ಕಾರವೆ_ಶೂನ್ಯ_ಬಿಂದುವೆ_ಲೀಲೆ,

#ಲಿಂಗವೆಂಬುದು_ಸರ್ವಕಾರಣ_ಪರಮ

#ಅಮೂಲ್ಯನು_ಅಪ್ರಮಾಣನು_ಅಗೋಚರ

Picture post designed and created by me. Hope you all will like it. A small service to popularise Vachana Sahitya.